Treningda 42 nafar ishtirokchi qatnashdi. Tadbirning asosiy maqsadi Ispaniyaning Madrid politexnika universitetida (UPM) o‘tkazilgan malaka oshirish tadbirlari davomida olingan bilim va tajribalarni almashish, kasbiy kompetensiyalarni mustahkamlash hamda O‘zbekistonda barqaror energetika sohasidagi ta’limni rivojlantirishdan iborat bo‘ldi. Tadbirda Toshkent shahridagi Turin politexnika universiteti, Germaniyaning Anhalt amaliy fanlar universiteti hamda Qozog‘istondagi Anhalt xalqaro universiteti vakillari ishtirok etdilar.

Mashg‘ulotlar beshta asosiy mavzuni qamrab oldi: O‘zbekistonda barqaror va ekologik toza energiya ta’minotini yo‘lga qo‘yish maqsadida gaz tarmoqlarini rejalashtirish va ekspluatatsion optimallashtirish uchun modellashtirish; gibrid quyosh elektr stansiyalari; muqobil energiya manbalari asosida yangi texnik ishlanmalarni loyihalash; LPWAN texnologiyalari va buyumlar internetining (IoT) kelajagi; tekshirilgan VNF orkestratsiyasi orqali vaqtga sezgir sanoat buyumlar interneti (IIoT) ilovalari uchun xizmatlarning ishonchli taqdim etilishini ta’minlash.

Trening xalqaro miqyosda bilim va tajriba almashish imkoniyatini yaratdi, ta’lim muassasalari o‘rtasidagi hamkorlikni mustahkamladi hamda O‘zbekistondagi oliy ta’lim tizimiga innovatsion texnologiyalar va barqaror energetika yechimlarini integratsiya qilishni qo‘llab-quvvatladi.